అయోధ్య రామాలయ ట్రస్టుకు తాత్కాలిక ప్రధాన కార్యదర్శిగా కృష్ణమోహన్

శ్రీరామ జన్మభూమి తీర్థ క్షేత్ర ట్రస్టుకు తాత్కాలిక ప్రధాన కార్యదర్శిగా రిటైర్డ్ ఐఎఫ్ఎస్ అధికారి కృష్ణమోహన్ నియమితులయ్యారు. ట్రస్ట్ ప్రధాన కార్యదర్శి చంపత్ రాయ్ రాజీనామా చేయడంతో ఈ నియామకం జరిగింది. శుక్రవారం జరిగిన ట్రస్ట్ సమావేశంలో ఈ రాజీనామాను ఆమోదించారు. సమావేశానికి ట్రస్ట్ అధ్యక్షుడు మహంత్ నృత్యగోపాల్ దాస్ అనారోగ్యం కారణంగా హాజరు కాలేదు.

ట్రస్ట్ లో అవినీతి ఆరోపణలు వెలుగు చూస్తున్నాయి. దాదాపు రూ.5 కోట్ల విలువైన 151 కిలోల బంగారంతో తయారైన రామచరిత మానస గ్రంథం మాయమైంది. ఈ గ్రంథాన్ని ఓ రిటైర్డ్ ఐఏఎస్ అధికారి దానం చేశారు. దీనిలో 500 పేజీలు, 10,902 శ్లోకాలు ఉన్నాయి. మహారాష్ట్ర మాజీ ముఖ్యమంత్రి ఉద్ధవ్ ఠాక్రే పంపిన 4 కిలోల బంగారం కూడా జాడ లేదని ఆరోపణలు వచ్చాయి. భక్తులు ఇచ్చిన విరాళాలు, కానుకల నగదు దుర్వినియోగం జరిగిందనే ఫిర్యాదులతో ఎనిమిది మందిని అరెస్టు చేశారు. వీరిలో ఓ ఉపాధ్యాయుడు, కారు మెకానిక్, రిటైర్డ్ బ్యాంకు ఉద్యోగి ఉన్నారు. వారి ఇళ్ల నుంచి రూ.20 లక్షలు, రూ.7 లక్షలు, రూ.18 లక్షలు, రూ.14 లక్షల నగదు స్వాధీనం చేసుకున్నారు. ఈ కేసును ప్రత్యేక దర్యాప్తు బృందం (ఎస్ఐటీ) చేస్తోంది.

ఈ నేపథ్యంలో తెలంగాణ బీసీ సంక్షేమ శాఖ మంత్రి పొన్నం ప్రభాకర్ కేంద్ర ప్రభుత్వంపై విమర్శలు చేశారు. ప్రధాని నరేంద్ర మోడీ, కేంద్ర హోం మంత్రి అమిత్ షా, ఉత్తర ప్రదేశ్ ముఖ్యమంత్రి యోగి ఆదిత్యనాథ్ లకు సన్నిహితులు ప్రజల సొమ్ము ఎత్తుకుపోయినా కేంద్రం ఎందుకు స్పందించడం లేదని ఆయన ప్రశ్నించారు. ట్రస్ట్ తరఫున ఈ ఆరోపణలపై స్పందన లభ్యం కాలేదు.