మహారాష్ట్రలో కుర్మి జోడో ఐక్యత ఉద్యమం ప్రారంభం

మహారాష్ట్రలో కుర్మి జోడో ఐక్యత ఉద్యమం ఛత్రపతి శివాజీ మహారాజ్ రాష్ట్రాభిషేక దినోత్సవం సందర్భంగా ప్రారంభమైంది. ఈ కార్యక్రమంలో దేశవ్యాప్తంగా 18 రాష్ట్రాల నుంచి కుర్మి, కాపు, కుంభి సామాజిక వర్గాల ప్రతినిధులు పెద్ద సంఖ్యలో పాల్గొన్నారు.

ముందుగా ఛత్రపతి శివాజీ విగ్రహానికి పూలమాలలు వేసి నివాళులర్పించారు. తెలంగాణ మున్నూరుకాపు పటేల్ సంఘం మాజీ రాష్ట్ర అధ్యక్షులు డాక్టర్ కొండదేవయ్య పటేల్ ముఖ్య అతిథిగా హాజరై మాట్లాడారు.

నిజాం పాలనలో హైదరాబాద్ రాష్ట్రం ఔరంగాబాద్ వరకు ఉండేదని, ఆ కాలంలో మున్నూరుకాపు, కుంభి, కుర్మి, కాపు వర్గాలన్నీ ఒకే మూలాలతో కలిసి ఉండేవని ఆయన గుర్తుచేశారు. ప్రాంతాల విభజనతో సంబంధాలు తగ్గిపోయాయని, ఇప్పుడు అన్ని రాష్ట్రాల కాపు సోదరులు ఒకే వేదికపైకి రావాల్సిన అవసరం ఉందని పిలుపునిచ్చారు.

సర్దార్ వల్లభాయి పటేల్, ఛత్రపతి శివాజీ మార్గంలో నడుస్తూ సమాజ పూర్వ వైభవాన్ని తిరిగి తీసుకురావాలని ఆయన అన్నారు. త్వరలో అఖిల భారతీయ కాపు ఐక్యవేదిక పేరుతో జాతీయ స్థాయి సమావేశం నిర్వహిస్తామని ప్రకటించారు.