జపాన్ ప్రధాని తకైచి బైక్‌పై ప్రేమ: మోదీ జోక్‌తో భారత్-జపాన్ భాగస్వామ్యానికి ఊతం

ప్రధాని నరేంద్ర మోదీ, జపాన్ కొత్త ప్రధాని సనే తకైచితో జరిగిన ద్వైపాక్షిక సమావేశంలో ఆమె మోటార్‌సైకిల్‌పై ఉన్న ప్రేమను ప్రస్తావిస్తూ జోక్ చేశారు. ఈ సందర్భంగా భారత్‌-జపాన్ ఆర్థిక భాగస్వామ్యం పట్ల ఆశావాదాన్ని వ్యక్తం చేశారు. 'తకైచి జీ, మీకు మోటార్ బైక్‌ంటే చాలా ఇష్టమని నాకు చెప్పారు. కవాసకీ, యమహా, హోండా బైక్‌లు భారత్ లో తయారై ప్రపంచ వ్యాప్తంగా ఎగుమతి అవుతున్నాయి. అలాగే ఎయిర్ కండిషనర్లు, పవర్ గ్రిడ్ పరికరాలు, ప్రెసిషన్ మాన్యుఫాక్చరింగ్, మెడికల్ టెక్నాలజీ.. ఇలా ప్రతి రంగంలో జపాన్ నైపుణ్యం, భారత వేగం మరియు స్కేల్ కలిస్తే మొత్తం ప్రపంచానికే లాభం చేకూరుతుంది' అని మోదీ పేర్కొన్నారు. ఇటీవలే జపాన్ ప్రధానిగా బాధ్యతలు చేపట్టిన తకైచితో ఇదే తొలి ద్వైపాక్షిక చర్చ. ఈ సమావేశంలో రక్షణ, వాణిజ్యం, ఇన్వెస్ట్‌మెంట్, హైటెక్నాలజీ వంటి కీలక అంశాలపై ఇరు దేశాలు చర్చించాయి. ప్రత్యేకంగా, భారత్ లో జపాన్ కంపెనీలు మెడికల్ టెక్నాలజీ, పవర్ గ్రిడ్, మాన్యుఫాక్చరింగ్ రంగాల్లో పెట్టుబడులు పెట్టే అవకాశాలను సమీక్షించారు. భారత్-జపాన్ ఆర్థిక సంబంధాలు గత కొన్నేళ్లలో బాగా పెరిగాయి. జపాన్ నుంచి పలు కంపెనీలు మేకిన్ ఇండియా కార్యక్రమంలో భాగస్వామిగా పాల్గొంటున్నాయి. ఈ నేపథ్యంలో ఈ సమావేశం ద్వైపాక్షిక సహకారాన్ని మరింత విస్తృతం చేస్తుందని అంచనా.