సోమవారం శివలింగ పూజ: ఇంట్లో పూజించే విధానం, పంచాయతన పద్ధతి

హిందూ సంప్రదాయం ప్రకారం సోమవారం నాడు శివుడి పూజకు ప్రత్యేక ప్రాధాన్యత ఉంది. ఇంట్లో శివలింగాన్ని పూజించే విధానం గురించి పండితులు కొన్ని వివరాలు తెలియజేస్తున్నారు.

దైనందిన అభిషేకం కోసం ఇంట్లో ఒకే శివలింగాన్ని వాడాలి. రాయితో చేసినవి, లోహాలతో చేసినవి వంటి వివిధ రకాల శివలింగాలను సేకరించి పూజా గదిలో అలంకారంగా ఉంచుకోవచ్చు. కానీ నిత్యం అభిషేకం చేసేది ఒక్క లింగానికి మాత్రమే.

పంచాయతన పూజా విధానం ఇంటి పూజకు అత్యుత్తమమని ధార్మిక గ్రంథాలు చెబుతున్నాయి. మధ్యలో శివలింగం, నైరుతి వైపు గణపతి, వాయవ్యంలో దుర్గాదేవి, ఈశాన్యాన విష్ణువు, ఆగ్నేయంలో సూర్యనారాయణ మూర్తిని ప్రతిష్టించి అర్చన చేయాలి. ఈ విధానంలో సమస్త కుటుంబ సభ్యుల శ్రేయస్సు కలుగుతుందని నమ్మకం.

పూజా క్రమంలో ఆవాహన, ఆసనం, పాద్యం, అర్ఘ్యం, పంచామృత స్నానం, ధూపం, దీపం, నైవేద్యం, హారతి, మంత్రపుష్పం వంటి అంగాలను చేయాలి. ఇంటిలో పూజ అనంతరం ఉద్వాసన మంత్రం చెప్పకూడదని, నమస్కారం మాత్రమే సమర్పించాలని వివరించారు. మారేడు దళాలతో అర్చన చేయడం వలన శివుడి అనుగ్రహం సంపూర్ణంగా లభిస్తుందని పండితులు తెలిపారు.