నాగర్‌కర్నూల్‌లో ఈదురుగాలులతో కూడిన వర్షం; రైస్‌మిల్లు కుప్పకూలిన ఘటనలో భారీ ఆస్తి నష్టం

నాగర్‌కర్నూల్ జిల్లా గుడిపల్లి గ్రామంలో నిన్న సాయంత్రం ఈదురుగాలులతో కూడిన భారీ వర్షం కురిసింది. ఈ వర్షం సుడిగాలి రూపంలోకి మారడంతో అక్కడి ఓ రైస్‌మిల్లు పాక్షికంగా కుప్పకూలింది. మిల్లు పైకప్పు, యంత్రాల పైపులు, ఇతర నిర్మాణాలు ఒక్కసారిగా విరిగిపడ్డాయి.

మిల్లులో ప్రాసెసింగ్‌లో ఉన్న బియ్యం, వరి ధాన్యం తడిసిపోయి ముద్దలా మారాయి. మిల్లు యాజమాన్యం ప్రాథమిక అంచనా ప్రకారం రూ.8 కోట్ల మేర ఆస్తి నష్టం జరిగింది. తదుపరి లెక్కల ప్రకారం నష్టం రూ.8 నుంచి 10 కోట్ల వరకు ఉండవచ్చని యాజమాన్యం తెలిపింది.

తుఫాను శబ్దం రావడంతో అప్రమత్తమైన మిల్లు యాజమాన్యం కార్మికులను, ఆపరేటర్లను వెంటనే బయటకు పంపించింది. దీంతో ఎలాంటి ప్రాణాపాయం జరగలేదని, అదృష్టవశాత్తు కార్మికులు బయటపడ్డారని స్థానికులు చెప్పారు.