నల్గొండ కుటుంబ హత్య కేసు: నలుగురు నిందితుల అరెస్ట్, ఆర్థిక వివాదమే కారణం

నల్గొండలో ఒకే కుటుంబానికి చెందిన నలుగురు చనిపోయిన ఘటనలో పోలీసులు నలుగురు నిందితులను అరెస్ట్ చేశారు. ఈ కేసుపై ఎస్పి శరత్ చంద్ర పవార్ మీడియా సమావేశంలో వివరాలు వెల్లడించారు.

రుణం, ఆర్థిక వివాదాలే ఈ హత్యలకు కారణమని ఎస్పి తెలిపారు. మృతురాలు హసీనా వద్ద ఆమె మేనకోడలు భర్త సయ్యద్ అస్లాం గతంలో కొంత డబ్బు అప్పుగా తీసుకున్నాడు. తిరిగి డబ్బు అడిగినా హసీనా నిరాకరించడంతో అస్లాం కక్ష పెంచుకున్నాడు.

హత్యకు ముందు అస్లాం YouTube లో నేరాలకు సంబంధించిన వీడియోలు చూసి పథకం వేశాడని పోలీసులు తెలిపారు. జూన్ 19, 20 మధ్య రాత్రి అస్లాం ఇంట్లోకి చొరబడి మొదట హసీనాను, ఆ తర్వాత ఆమె భర్త సుల్తాన్, కుమారుడు ముజుమిల్, కుమార్తె అఫ్రాన్ లను హత్య చేశాడు. ఇంట్లో ఉన్న నగదు, బంగారు ఆభరణాలు దోచుకుని పరారయ్యారు.

ఈ ఘటన జూన్ 22న ఇంటి నుంచి దుర్వాసన రావడంతో స్థానికులు పోలీసులకు సమాచారం ఇచ్చారు. పోలీసులు సాంకేతిక ఆధారాలతో నిందితులను గుర్తించి, నార్కేట్పల్లి ఫ్లైఓవర్ సమీపంలో అరెస్ట్ చేశారు. ప్రధాన నిందితుడు అస్లాం, అతని భార్య తబస్సుం, స్నేహితుడు సోహైల్, నగల వ్యాపారి హేమంత్ కుమార్ లను అరెస్ట్ చేసి, కోర్టులో హాజరుపరిచి రిమాండ్ కు తరలించారు.