నల్గొండలో ఒకే కుటుంబంలో నలుగురు హత్య; కుటుంబ కలహాల కోణంలో దర్యాప్తు

నల్గొండ జిల్లా కేంద్రంలోని తెలంగాణ కాలనీలో ఒకే కుటుంబానికి చెందిన నలుగురు హత్యకు గురయ్యారు. మృతదేహాలు కుళ్ళిన స్థితిలో గురువారం పోలీసులు బయటపెట్టారు.

సాగర్ రోడ్డు సమీపంలో నివాసం ఉంటున్న మహమ్మద్ సుల్తాన్ (బ్యాగ్ ల తయారీ షాప్ లో పని), ఆయన రెండో భార్య హసీనా (ప్రైవేటు పాఠశాలలో టీచర్), వారి కుమారుడు ముజమ్మిల్ (ఏఎస్ వర్కర్), కూతురు (ఏడో తరగతి) మృతి చెందారు. ఇంటి నుంచి దుర్వాసన రావడంతో స్థానికులు పోలీసులకు డయల్ 100లో సమాచారం ఇచ్చారు. పోలీసులు తలుపులు పగలగొట్టి చూడగా నాలుగు మృతదేహాలు కుళ్ళిపోయిన స్థితిలో కనిపించాయి.

ప్రాథమిక విచారణలో ఇది హత్యేనని పోలీసులు నిర్ధారించారు. మృతదేహాలపై పదునైన ఆయుధంతో దాడి చేసిన గాయాలు, రక్తపు మరకలు కనిపించాయి. శుక్రవారం రాత్రి నుంచి ఇంటి నుంచి బయటకు రాకపోవడం, అదే రోజు రాత్రి ఇంట్లో నుంచి అరుపులు వినిపించినట్లు స్థానికులు చెప్పడంతో ఆ సమయంలోనే హత్యలు జరిగి ఉంటాయని అనుమానిస్తున్నారు.

కేసును ఛేదించేందుకు జిల్లా ఎస్పీ శరత్ చంద్ర పవర్ రెండు ప్రత్యేక బృందాలను ఏర్పాటు చేశారు. సిసిటీవీ ఫుటేజీ, కాల్ డాటా విశ్లేషిస్తున్నారు. ఘటనకు ముందు రోజు రాత్రి ఆటో, రెండు బైక్‌లపై వచ్చిన తొమ్మిది మంది కాలనీలో కనిపించినట్లు ఫుటేజీలో గుర్తించారు. ఈ బృందమే హత్యలు చేసి ఉండొచ్చని అనుమానిస్తున్నారు.

మృతుల కుటుంబ సభ్యులు మీడియాతో మాట్లాడుతూ పిల్లలిద్దరూ కొన్ని రోజుల క్రితం బంధువుల ఇంట్లో ఉండి, తిరిగి వచ్చినట్లు తెలిపారు. ఫోన్లు చేసినా స్పందన లేకపోవడంతో తాము వచ్చి చూడగా ఘటన వెలుగులోకి వచ్చిందని చెప్పారు. ఫోరెన్సిక్ రిపోర్టు రాగానే మరిన్ని వివరాలు తెలుస్తాయని పోలీసులు వెల్లడించారు. కుటుంబ కలహాలే హత్యకు కారణమా అన్న కోణంలోనూ దర్యాప్తు సాగుతోంది.