జార్ఖండ్‌లో AC కోచ్‌లో దీపం వెలిగించి పూజ చేసిన ప్రయాణికుడు; నెటిజన్ల ఆగ్రహం

జార్ఖండ్ రాష్ట్రంలోని ఓ రైలు AC కోచ్‌లో ప్రయాణిస్తున్న వ్యక్తి దీపం, అగరబత్తీలు వెలిగించి పూజ చేశాడు. ఈ సంఘటనకు సంబంధించిన వీడియో సోషల్ మీడియాలో వైరల్ కావడంతో నెటిజన్లు ఆగ్రహం వ్యక్తం చేస్తున్నారు.

రైలులో ప్రయాణిస్తున్న ఆ వ్యక్తి తన బెర్త్ పై దీపం వెలిగించడంతో పాటు అగరబత్తీలు వెలిగించి, చివరకు కర్పూరం వెలిగించి హారతి ఇచ్చాడు. ఇది గమనించిన సహచర ప్రయాణికులు వెంటనే అడ్డుకోవడానికి ప్రయత్నించారు. AC కోచ్‌లో దీపం, అగరబత్తీలు వెలిగించడం ఫైర్ సేఫ్టీ నిబంధనలకు విరుద్ధమని, దీంతో ప్రమాదం జరిగే ప్రమాదం ఉందని వారు హెచ్చరించారు.

అయితే, ఆ ప్రయాణికుడు మొదట తన పూజా భక్తికి ఎవరూ ఆటంకం కలిగించకూడదని వాదించాడు. అయినా ప్రయాణికులు తీవ్రంగా నిలదీయడంతో చివరకు దీపం, అగరబత్తీలను ఆర్పేశాడు. ఆ బోగీలో మంటలు రాకుండా నివారించడమే లక్ష్యమని, అతని మతాన్ని లేదా భక్తిని ప్రశ్నించడం లేదని ప్రయాణికులు స్పష్టం చేశారు.

ఈ ఘటన వీడియో సోషల్ మీడియాలో చక్కర్లు కొడుతోంది. పలువురు నెటిజన్లు ఈ చర్యను ఖండించారు. రైళ్లలో ఫైర్ సేఫ్టీ నిబంధనలను పాటించాల్సిన బాధ్యత ప్రయాణికులందరికీ ఉందని, ఇలాంటి వైఖరి ప్రమాదాలకు కారణమవుతుందని వారు అభిప్రాయపడ్డారు. కొందరు నెటిజన్లు ప్రయాణికుడిపై చర్యలు తీసుకోవాలని రైల్వే అధికారులను డిమాండ్ చేశారు.

రైల్వే నిబంధనల ప్రకారం, ఏసీ కోచ్‌లలో దీపం, అగరబత్తీలు, అగ్గిపుల్లలు వంటివి వెలిగించడం నిషేధం. ఉల్లంఘిస్తే కఠిన చర్యలు తీసుకుంటారు. సంబంధిత రైల్వే అధికారులు ఈ ఘటనపై విచారణ చేపట్టనున్నారా లేదా అనేది ఇప్పటికి తెలియరాలేదు.