PM Modi: సరిహద్దు గ్రామాలను 'దేశపు తొలి గ్రామాలు'గా పరిగణించాలి

ప్రధాని నరేంద్ర మోదీ సరిహద్దు గ్రామాలను దేశపు 'తొలి గ్రామాలు'గా పరిగణించాలన్నారు. వాటిని చివరి గ్రామాలుగా చూడటం సరికాదని, ఆ ప్రాంతాల అభివృద్ధే ప్రభుత్వ లక్ష్యమని చెప్పారు.

మోదీ 'వికసిత్ భారత్ వైబ్రెంట్ విలేజ్' కార్యక్రమంలో భాగంగా యువతతో మాట్లాడారు. సరిహద్దు గ్రామాల్లో మౌలిక సదుపాయాలు మెరుగుపడ్డాయని, రోడ్లు, విద్యుత్, టెలిఫోన్, గ్యాస్ అందుబాటులోకి వచ్చాయని వివరించారు. గతంలో నిర్లక్ష్యానికి గురైన ఈ గ్రామాలకు ఇప్పుడు అన్ని వసతులు కల్పిస్తున్నామన్నారు.

ఈ కార్యక్రమంలో పలువురు యువత తమ అనుభవాలు పంచుకున్నారు. హిమాచల్ ప్రదేశ్‌లోని చాంగో గ్రామాన్ని సందర్శించిన నికిత అక్కడి మార్పులను వివరించారు. ఉత్తరప్రదేశ్‌కు చెందిన సోనీ స్పితి లోయలో, చిత్తూరుకు చెందిన భవ్య హర్షిల్ లోయలో ఎదురైన అనుభవాలు చెప్పారు. అండమాన్‌కు చెందిన సైంతిక లడఖ్‌లో పర్యటించిన విషయాలు తెలిపారు.

రెండు దశల్లో జరిగిన ఈ కార్యక్రమం జూన్ 4 నుంచి 30 వరకు లడఖ్, హిమాచల్ ప్రదేశ్, ఉత్తరాఖండ్‌లలోని 74 సరిహద్దు గ్రామాలను కవర్ చేసింది. ప్రధాని మోదీ 2016 దీపావళికి చాంగోలో సైనికులతో గడిపిన విషయాన్ని గుర్తు చేసుకున్నారు. సరిహద్దు ప్రాంత ప్రజలు దేశభక్తి విషయంలో ఎన్నటికీ రాజీపడరని చెప్పారు.