పండ్లు, కూరగాయలను డీహైడ్రేట్ చేసి లాభాలు పొందుతున్న గుంటూరు రైతు

గుంటూరు జిల్లా కొల్లిపర్ల మండలానికి చెందిన రిటైర్డ్ ఉద్యోగి జొన్నల శ్రీనివాస్ రెడ్డి, పండ్లు, కూరగాయలను డీహైడ్రేట్ చేసి, వాటిని పొడులు, చిప్స్‌గా మార్చి మంచి లాభాలు పొందుతున్నారు. ఆయన భారత్ డైనమిక్స్ లిమిటెడ్, వెమ టెక్నాలజీస్‌లో పనిచేసి 2020లో రిటైర్ అయ్యారు.

స్వగ్రామానికి తిరిగి వచ్చిన తర్వాత, ఆర్గానిక్ వ్యవసాయం మీద ఆసక్తితో నిమ్మతోట, వివిధ రకాల పండ్ల మొక్కలు వేశారు. పండిన పంటలు త్వరగా పాడవకుండా, వాటి షెల్ఫ్ లైఫ్‌ను పెంచేందుకు డీహైడ్రేటర్ యంత్రాన్ని కొనుగోలు చేశారు. ఈ యంత్రం ధర సుమారు రూ.4.5 లక్షలు; ఇతర పరికరాలతో కలిపి మొత్తం రూ.6.5 లక్షల వరకు ఖర్చు అయింది.

ఆయన ప్రధాన మంత్రి సూక్ష్మ ఆహార పరిశ్రమ పథకం (PMFME) కింద 35% సబ్సిడీతో, బ్యాంకు రుణం ద్వారా ఈ సెటప్ ఏర్పాటు చేశారు. చుట్టుప్రకల రైతుల నుండి స్థానికంగా లభించే పండ్లు, కూరగాయలు, ఆకుకూరలను కొనుగోలు చేసి, వాటిని శుభ్రంగా కట్ చేసి డీహైడ్రేటర్‌లో ఉంచుతారు. యంత్రం ఆటోమేటిక్‌గా టెంపరేచర్ నియంత్రించి, నీటి శాతం పూర్తిగా తొలగించి, చిప్స్ లేదా పొడి రూపంలో తయారు చేస్తుంది.

ఇలా తయారైన డ్రై ఫ్రూట్స్, పొడులకు 6 నుంచి 8 నెలల వరకు నిల్వ ఉంటుంది; ఫ్రిడ్జ్‌లో ఉంచితే ఏడాది వరకు నిల్వ చేయవచ్చు. అరటికాయ పొడి, మామిడి పొడి (ఆమ్చూరు), అల్లం పొడి, కరివేపాకు పొడి, నిమ్మపొడికి బాగా డిమాండ్ ఉంది. హైదరాబాద్‌తో పాటు అమెరికా వెళ్ళే ప్రవాసులు కూడా వీటిని తీసుకెళ్తున్నారు.

ఇటీవల ఎగుమతి ఆర్డర్ కోసం 100 కేజీల కరివేపాకు పొడి సిద్ధం చేశారు. భవిష్యత్తులో పెద్ద ఎత్తున ఉత్పత్తి చేసి, గ్రామీణ రైతులకు అదనపు ఆదాయం అందించాలని లక్ష్యంగా పెట్టుకున్నారు.