తిరుపతి రైతు బజార్ వ్యాపారుల ఆందోళన: అనధికారిక దుకాణాల తొలగింపు డిమాండ్

తిరుపతి రాయల చెరువు రోడ్డులోని రైతు బజార్ వ్యాపారులు బుధవారం ఆందోళన చేపట్టారు. రైతు బజార్ వెలుపల రోడ్డుపై ధర్నాకు దిగారు. రైతు బజార్ బయట ఏర్పాటు చేసిన అనధికారిక దుకాణాలను వెంటనే తొలగించాలని డిమాండ్ చేశారు.

దలారులు, అనధికారిక దుకాణాల కారణంగా తమ వ్యాపారం దెబ్బతింటోందని వారు ఆరోపించారు. 2001లో అప్పటి ముఖ్యమంత్రి చంద్రబాబు నాయుడు తిరుపతి నడిబొడ్డున ఈ స్థలాన్ని రైతు బజార్ కోసం కేటాయించారని, రైతులతో పాటు నిరుద్యోగులు, వికలాంగులు, మహిళా సంఘాలకు కూడా ఇది ప్రయోజనకరంగా ఉండేదని వారు గుర్తు చేశారు.

గత రెండున్నర సంవత్సరాలుగా అనధికారిక షాపులు ఎక్కువైపోయాయని, ఎన్నోసార్లు అధికారులకు విన్నపాలు సమర్పించినా, కలెక్టర్, ఎస్పీ, కమిషనర్, ట్రాఫిక్ ఆఫీసులకు లేఖలు ఇచ్చినా సమస్య పరిష్కారం కాలేదని నిరసనకారులు ఆవేదన వ్యక్తం చేశారు. తమకు న్యాయం జరిగే వరకు నిరసన కొనసాగిస్తామని స్పష్టం చేశారు.