అయోధ్య రామాలయంలో భక్తుల కానుకల చోరీపై SIT నివేదిక: సిబ్బంది చేతివాటం వెల్లడి

అయోధ్య రామాలయంలో భక్తుల కానుకలను కొట్టివేసిన కేసులో సిట్ మధ్యంతర నివేదిక సంచలన విషయాలు బయటపెట్టింది. కానుకల లెక్కింపు సిబ్బందే నగదు, బంగారు ఆభరణాలు దొంగిలించారని దర్యాప్తులో తేలింది. రహస్య కెమెరాల ద్వారా సిబ్బంది చేతివాటం రికార్డయ్యింది.

భక్తులు సమర్పించిన నోట్ల కట్టలు డిపాజిట్ చేసేప్పుడు నగదు తక్కువ రావడం గమనించిన అధికారులు అనుమానంతో లెక్కింపు గదిలో సిబ్బందికి తెలియకుండా రహస్య కెమెరాలు ఏర్పాటు చేశారు. ఈ కెమెరాల్లో సిబ్బంది సిసి కెమెరాలను కవర్ చేస్తూ నోట్ల కట్టల నుంచి డబ్బు తీసుకొని దుస్తుల్లో దాచుకోవడం, తరువాత ఆ నగదును టాయిలెట్లలో దాచడం రికార్డయ్యింది. ఈ ఏడాది ఏప్రిల్ 27 నుంచి జూన్ 5 మధ్య 70 సార్లు చోరీ జరిగినట్లు సిట్ గుర్తించింది.

నిందితుల్లో డిపాజిట్ వోచర్లు రాసే అనుకుల్పు మిశ్రా, అతని బావమరిది లవకుష్ మిశ్రా ఉన్నారు. లవకుష్ ఇంట్లో పోలీసులు సోదాలు నిర్వహించి 10 లక్షల నగదు స్వాధీనం చేసుకున్నారు. మాజీ ట్రస్ట్ ప్రధాన కార్యదర్శి డ్రైవర్గా పనిచేసిన రామశంకర్ యాదవ్ బంధువులను లెక్కింపు గదిలో సిఫారసులతో నియమించారు. అవినాష్ పాండే అనే మరో నిందితుడు దొంగిలించిన నగదును తన బ్యాంకు ఖాతాల్లో జమ చేశాడు. బంగారు కమ్మలు, ముక్కు పుడకలు, గాజులు, వెండి వస్తువులు సైతం రికార్డుల్లో నమోదు కాకుండా కొట్టేసినట్లు దర్యాప్తు వెల్లడించింది.

శ్రీరామ జన్మభూమి తీర్థ క్షేత్ర ట్రస్ట్ ప్రధాన కార్యదర్శి చంపత్ రాయ్, ట్రస్ట్ సభ్యుడు అనిల్ మిశ్రా తమ పదవులకు రాజీనామా చేశారు. ఇప్పటికి 7 నుంచి 7.5 కోట్ల రూపాయలు తస్కరించినట్లు అంచనా కాగా, కేవలం 70 లక్షలు మాత్రమే రికవరీ చేశారు. లెక్కింపు గది నుంచి బయటకు వెళ్లే ఉద్యోగులను తనిఖీ చేయకపోవడం ఈ చోరీకి ప్రధాన కారణమని అధికారులు పేర్కొన్నారు.