వర్షాలు లేక ఉక్కపోతతో తెలంగాణలో 7.3% పెరిగిన విద్యుత్ వినియోగం

ఎల్నినో ప్రభావంతో వర్షాలు లేకపోవడం, ఉక్కపోత కారణంగా తెలంగాణలో విద్యుత్ వినియోగం రికార్డు స్థాయికి చేరింది.

TSSPDCL CMD జితేంద్ర పాటిల్ తెలిపిన వివరాల ప్రకారం.. గృహ, వాణిజ్య, పారిశ్రామిక, ఐటీ, వ్యవసాయ, సేవా రంగ సంస్థలు, ఆసుపత్రులు, విద్యాసంస్థల్లో ఏసీలు, కూలర్లు, ఫ్యాన్ల వాడకం పెరిగిందని, దీంతో విద్యుత్ డిమాండ్ పెరిగిందని వివరించారు.

జూలై 1 నుంచి 14 వరకు నమోదైన గణాంకాల ప్రకారం.. TSSPDCL పరిధిలో మొత్తం విద్యుత్ వినియోగం 2,510.23 మిలియన్ యూనిట్లకు చేరింది. గత ఏడాది ఇదే కాలంతో పోలిస్తే అదనంగా 171.44 మిలియన్ యూనిట్ల వినియోగం పెరిగింది. అంటే 7.3% అధికంగా విద్యుత్ వినియోగించారు.

గ్రేటర్ హైదరాబాద్ పరిధిలో మాత్రమే ఈ పెరుగుదల 11.9% గా నమోదైంది. రాష్ట్రంలో అత్యధిక విద్యుత్ వినియోగం గ్రేటర్ హైదరాబాద్ లోనే నమోదవుతుందని అధికారులు తెలిపారు. పెరిగిన డిమాండ్‌ను దృష్టిలో ఉంచుకొని ప్రభుత్వం ముందస్తు ప్రణాళికతో తగినంత విద్యుత్తును సమకూర్చుతుందని అధికారులు పేర్కొన్నారు.