టీజీఎస్పీడీసీఎల్ సమగ్ర విద్యుత్ నెట్వర్క్ మ్యాపింగ్ డ్రైవ్ ప్రారంభం

తెలంగాణ సదరన్ పవర్ డిస్ట్రిబ్యూషన్ కంపెనీ లిమిటెడ్ (టీజీఎస్పీడీసీఎల్) విద్యుత్ సరఫరా వ్యవస్థను బలోపేతం చేసేందుకు సమగ్ర నెట్వర్క్ మ్యాపింగ్ డ్రైవ్‌ను ప్రారంభించింది. విద్యుత్ అంతరాయాలను గుర్తించి సత్వర సేవలు అందించడం దీని లక్ష్యం. ముఖ్యమంత్రి రేవంత్ రెడ్డి, డిప్యూటీ సీఎం భట్టి విక్రమార్క ఆదేశాలతో అధికారులు ఈ కార్యక్రమాన్ని చేపట్టారు.

ఫస్ట్ ఫేజ్‌లో ఈ డ్రైవ్‌ను కోర్ అర్బన్ రీజియన్ ఎకానమీ ప్రాంతంలో అమలు చేస్తారు. 132/33 KV ఈహెచ్‌టీ సబ్‌స్టేషన్ల నుండి 33/11 KV సబ్‌స్టేషన్లు, 11 KV ఫీడర్లు, డిస్ట్రిబ్యూషన్ ట్రాన్స్‌ఫార్మర్లు, చివరగా ప్రతి వినియోగదారుడి సర్వీస్ కనెక్షన్ వరకు మొత్తం నెట్వర్క్ అనుసంధానాన్ని డిజిటల్ రూపంలో నమోదు చేస్తారు.

జులై నెల బిల్లింగ్ ప్రక్రియలో భాగంగా మీటర్ రీడర్లు ప్రతి డీటీఆర్ (డిస్ట్రిబ్యూషన్ ట్రాన్స్‌ఫార్మర్)ని సందర్శించి, ఆ ట్రాన్స్‌ఫార్మర్‌కు లింక్ అయిన సర్వీసులను మ్యాపింగ్ చేస్తారు. ఒక కస్టమర్ ఇంటికి ఏ సబ్‌స్టేషన్, ఏ ఫీడర్ నుండి విద్యుత్ సరఫరా అవుతుందనే వివరాలు డిజిటల్‌గా నమోదవుతాయి.

మ్యాపింగ్ పూర్తయిన తర్వాత వినియోగదారులు 1912 కాల్ సెంటర్ లేదా వాట్సాప్ ద్వారా ఫిర్యాదు చేస్తే సమస్య ఎక్కడ ఉందో సిస్టమ్ ఆటోమేటిక్‌గా గుర్తిస్తుంది. కరెంట్ ఆగిపోవడానికి కారణం, పునరుద్ధరణకు పట్టే అంచనా సమయం వంటి వివరాలు వినియోగదారుడికి తెలుస్తాయి. దీనివల్ల సమస్యలు త్వరగా పరిష్కారమవుతాయని టీజీఎస్పీడీసీఎల్ పేర్కొంది.