అమెరికా–ఇరాన్ శాంతి ఒప్పందంతో భారత్‌కు ఆర్థిక ఊరట; ఇంధన ధరలు తగ్గొచ్చు: హీరో ఎంటర్‌ప్రైజెస్ చీఫ్

అమెరికా, ఇరాన్ మధ్య శాంతి ఒప్పందం దిశగా కీలక ప్రకటన వచ్చింది. శుక్రవారం నాటికి ఒప్పందంపై సంతకాలు చేయడానికి రెండు దేశాలు అంగీకరించాయి. దీని ద్వారా ప్రపంచ మార్కెట్లో ముడి చమురు ధరలు తగ్గుముఖం పట్టే అవకాశం ఉందని, ఇది భారత్‌పై సానుకూల ప్రభావం చూపుతుందని హీరో ఎంటర్‌ప్రైజెస్ చీఫ్ సునీల్ కాంత్ ముంజాల్ అభిప్రాయపడ్డారు.

మైండ్ మైన్ సమ్మిట్‌లో మాట్లాడుతూ, ఈ శాంతి ప్రయత్నం వల్ల ద్రవ్యోల్బణం, ఇంధన ధరలు తగ్గడంతో పాటు భారతీయుల జీవన వ్యయంపై భారం తగ్గుతుందని ఆయన తెలిపారు. ఈ సదస్సులో పట్టణ మౌలిక వసతుల అభివృద్ధి, ఆర్థిక సంక్షోభ నిర్వహణ, నాణ్యమైన ఇన్సూరెన్స్ అందుబాటు వంటి అంశాలపై చర్చలు జరుగుతాయని వివరించారు.

అగ్నిప్రమాదాల నుంచి వరదలు, ఇతర ప్రకృతి వైపరీత్యాల వరకు ఎదురయ్యే విపత్తుల నేపథ్యంలో సమగ్ర పరిష్కార మార్గాలను ఈ సదస్సు లక్ష్యంగా పెట్టుకుందన్నారు. సాధారణంగా రెండు రోజుల పాటు జరిగే ఈ సదస్సు ఈసారి ఒకే రోజుకు కుదించడం విశేషం. ఉదయం సెషన్‌ను కేంద్ర ఆర్థిక మంత్రి ప్రారంభించగా, సాయంత్రం ఆర్ఎస్ఎస్ చీఫ్ మోహన్ భాగవత్ బీఎం ముంజాల్ అవార్డులను ప్రదానం చేయనున్నారు. మానవ వనరులకు ప్రాధాన్యమిచ్చే కంపెనీలకు ఈ అవార్డులు ఇస్తారు. అదే వేదికపై ‘ది మేకింగ్ ఆఫ్ హీరో’ పుస్తకం బ్రెయిలీ వెర్షన్ కూడా విడుదల కానుంది.