అయోధ్య విరాళాల కేసు: తమ్ముడిని బలిపశువుగా మార్చారని సోదరుడి ఆరోపణ

అయోధ్య రామమందిర విరాళాల అక్రమాల కేసులో కీలక పరిణామాలు చోటుచేసుకుంటున్నాయి. ఈ కేసులో తన సోదరుడిని బాధ్యత నుండి తప్పించుకునేందుకు కొందరు పెద్దలు ఇరికించారని దినేశ్ యాదవ్ ఆరోపించారు.

దినేశ్ యాదవ్ తన తమ్ముడు టిన్ను యాదవ్ నిష్కలంక చరిత్ర కలిగిన వ్యక్తి అని, గత రెండు దశాబ్దాలుగా శ్రీరామ జన్మభూమి తీర్థక్షేత్ర ట్రస్ట్ ప్రధాన కార్యదర్శి చంపత్రాయ్తో కలిసి పని చేశారని చెప్పారు. తన సోదరుడి తరపున వాదించడానికి ఏ న్యాయవాది ముందుకు రావడం లేదని, ప్రభుత్వం లేదా కోర్టు న్యాయ సహాయం అందించాలని కోరారు.

మరోవైపు, తనను నమ్మిన వారే వెన్నుపోటు పొడిచారని చంపత్రాయ్ ఆవేదన వ్యక్తం చేశారు. తన పరిపాలనా బాధ్యత ముగిసిందని, ఇక ఆ పదవి చేపట్టబోనని చెప్పారు. వచ్చే వారం ట్రస్ట్ సమావేశంలో చంపత్రాయ్, ట్రస్టీ అనిల్ మిశ్రాల రాజీనామాలపై చర్చ జరగనుంది.

ఈ కేసులో ఇప్పటికే 8 మందిని అరెస్టు చేశారు. వీరి నుండి 80 లక్షల రూపాయల నగదు, విదేశీ కరెన్సీ స్వాధీనం చేసుకున్నారు. టిన్ను యాదవ్ గతంలో చంపత్రాయ్ డ్రైవర్‌గా పనిచేసి, విరాళాల పెట్టెల తాళాలను నిబంధనలకు విరుద్ధంగా కలిగి ఉన్నట్లు ప్రత్యేక దర్యాప్తు బృందం (ఎస్ఐటీ) కనుగొంది. అలాగే, ఆలయ ప్రాంగణంలో 400 మంది ప్రైవేటు భద్రతా సిబ్బంది పాత్రపైనా విచారణ జరుగుతోంది.

జూన్ 7న సమాజ్‌వాదీ పార్టీ అధినేత అఖిలేశ్ యాదవ్ ఆరోపణలతో ఈ వివాదం ప్రారంభమైంది. ట్రస్ట్ మొదట ఈ ఆరోపణలను ఖండించింది. యూపీ ప్రభుత్వం జూన్ 13న ఎస్ఐటీని ఏర్పాటు చేయగా, జూన్ 25న ఎఫ్ఐఆర్ నమోదు చేసింది.