సినీ పరిశ్రమకు శుభవార్త: సింగిల్ విండో అనుమతులు మరియు సమగ్ర జీవో త్వరలో అమలు చేస్తామని మంత్రి దుర్గేష్ హామీ

ఆంధ్రప్రదేశ్ రాష్ట్రంలో సినిమా పరిశ్రమ అభివృద్ధికి సింగిల్ విండో అనుమతులతో పాటు త్వరలోనే ఒక సమగ్ర జీవో కూడా తీసుకురాబోతున్నామని మంత్రి కందుల దుర్గేష్ స్పష్టం చేశారు. గుంటూరులో నిర్వహించిన అక్కినేని అఖిల్ నటించిన లేనిన్ చిత్రం బ్లాక్బస్టర్ సెలబ్రేషన్స్ కార్యక్రమంలో ఆయన ముఖ్య అతిథిగా పాల్గొన్నారు.

ఈ కార్యక్రమంలో మంత్రి దుర్గేష్ మాట్లాడుతూ తెలుగు నేలపై తెలుగు చలనచిత్ర పరిశ్రమ సుస్థిరంగా వేళ్ళూనుకోవాలని రాష్ట్ర ప్రభుత్వం దృఢంగా నిర్ణయించిందని తెలిపారు. స్టూడియోలు, డబ్బింగ్ థియేటర్లు, రీరికార్డింగ్ థియేటర్లు నిర్మించాలనుకునే వారికి సింగిల్ విండో ద్వారా అవసరమైన అన్ని అనుమతులు సత్వరంగా అందించడానికి ప్రభుత్వం సిద్ధంగా ఉందని ఆయన హామీ ఇచ్చారు.

పెట్టుబడిదారులకు అవసరమైన భూములు కల్పించడానికి కూడా ప్రభుత్వం వెనుకాడదని మంత్రి స్పష్టం చేశారు. విజయవాడ, గుంటూరు నడుమ, వైజాగ్ మరియు తిరుపతిల మధ్య అన్ని రకాల మౌలిక సదుపాయాలతో కూడిన స్థిరమైన చిత్ర పరిశ్రమను ఏర్పాటు చేయడానికి ప్రభుత్వం దీక్షాబద్ధంగా ఉందని ఆయన ప్రకటించారు.

ఆగస్టు 8వ తేదీన గుంటూరులో జరుగనున్న అమరావతి చిత్ర కళావిధి పోస్టర్‌ను అదే వేదికపై హీరో అఖిల్ చిత్రబృందం, సాంస్కృతిక సృజనాత్మక సమితి చైర్‌పర్సన్ తేజస్వి పొడపాటితో కలిసి మంత్రి ఆవిష్కరించారు. లేనిన్ సినిమా ఘన విజయం సాధించినందుకు హీరో అఖిల్, హీరోయిన్ భాగ్యశ్రీ బోర్సేతో పాటు చిత్ర యూనిట్ మొత్తానికి మంత్రి అభినందనలు తెలిపారు.