జపాన్ ప్రధాని తైకాచి భారత పర్యటన: మోదీతో భేటీలో 10 ట్రిలియన్ యెన్ల పెట్టుబడి లక్ష్యం

జపాన్ ప్రధాని సనాయే తైకాచి మూడు రోజుల అధికారిక పర్యటన కోసం ఢిల్లీకి చేరుకున్నారు. రాష్ట్రపతి భవన్‌లో ఆమెకు త్రివిధ దళాల గౌరవ వందనంతో ఘనస్వాగతం లభించింది. ప్రధాని మోదీ మంత్రివర్గ సభ్యులను ఆమెకు పరిచయం చేశారు.

తైకాచి జపాన్ తొలి మహిళా ప్రధానిగా, ప్రజాధారణ కలిగిన నాయకురాలిగా మోదీ అభివర్ణించారు. భారత్-జపాన్ బంధం కేవలం రెండు దేశాలకే పరిమితం కాదని ఆయన అన్నారు. వచ్చే 10 ఏళ్లలో జపాన్ నుంచి 10 ట్రిలియన్ యెన్ల పెట్టుబడి తీసుకురావాలన్న లక్ష్యాన్ని మోదీ ప్రకటించారు. ఇప్పటికే గత ఏడాది కుదిరిన వ్యాపార ఒప్పందాల ద్వారా 10 బిలియన్ డాలర్లకు పైగా పెట్టుబడులు రానున్నాయని తెలిపారు.

సెమీకండక్టర్లు, కృత్రిమ మేధస్సు (AI) రంగాల్లో సహకారం పెరుగుతోందని, ఆర్థిక భద్రత, ఇంధన భద్రతపై ఉమ్మడి రోడ్‌మ్యాప్ సిద్ధం చేసినట్లు మోదీ వివరించారు. 16వ భారత్-జపాన్ వార్షిక శిఖరాగ్ర సమావేశంలో వాణిజ్యం, పెట్టుబడులు, రక్షణ, కీలక ఖనిజాలు, ఇండో-పసిఫిక్ వ్యూహం తదితర అంశాలు చర్చించనున్నారు.

తైకాచి ప్రధాని పదవి చేపట్టిన తర్వాత భారత్‌కు రావడం ఇదే తొలిసారి. ఈ పర్యటనతో భారత్-జపాన్ ప్రత్యేక వ్యూహాత్మక గ్లోబల్ భాగస్వామ్యాన్ని మరింత బలోపేతం చేయాలని ఇరు దేశాలు లక్ష్యంగా పెట్టుకున్నాయి. రేపటి వరకు ఈ పర్యటన కొనసాగనుంది.