కోల్‌కతాలో షెడ్ కూలి 16 మంది సజీవంగా బయటికి.. నలుగురు మృతి, మరో 4 కోసం ఎన్డీఆర్ఎఫ్ గాలింపు

కోల్‌కతాలో షెడ్ కూలిన ఘటనలో ఎన్డీఆర్ఎఫ్ సహాయక బృందాలు ఇప్పటివరకు 16 మందిని సజీవంగా రక్షించి, నలుగురి మృతదేహాలను వెలికి తీశాయి. ఈ ప్రమాదంలో చిక్కుకున్న మరో నలుగురు బాధితులు ఇంకా శిథిలాల కింద ఉన్నట్లు గుర్తించామని, వారిని చేరుకునే ప్రయత్నంలో ఉన్నామని ఎన్డీఆర్ఎఫ్ అధికారి తెలిపారు. బాధితులపై భారీ గర్డర్లు పడి ఉండడంతో, వారి భద్రతను దృష్టిలో పెట్టుకుని గర్డర్ల భారాన్ని లెక్కించి, దశలవారీగా సహాయక చర్యలు చేపడుతున్నామని చెప్పారు. దీనివల్ల కొంత సమయం పడుతోందన్నారు. ఈ నలుగురిని 10 నుంచి 15 నిమిషాల్లోపు బయటకు తీసుకొచ్చే అవకాశం ఉంది. అదనంగా, సమాచారం అందిన మరో ప్రాంతంలోనూ రెండు అంతస్తులను కట్చేసి, నిలువుగా ఎయిర్ కట్ చేస్తూ చివరి అంతస్తు వరకు చేరుకున్నామని, అక్కడ వివిధ పరికరాలతో స్కానింగ్ కొనసాగిస్తున్నామని అధికారి వివరించారు. ఇప్పటివరకు అక్కడ ఎవరినీ గుర్తించలేదు కానీ, సమాచారం ఆధారంగా ప్రయత్నిస్తున్నామని చెప్పారు. ప్రస్తుతం రెండు బృందాలు ఏకకాలంలో పని చేస్తున్నాయి. గరిష్టంగా సజీవ బాధితులను రక్షించడమే లక్ష్యంగా చర్యలు కొనసాగుతున్నాయి.