మహారాష్ట్రలో భారీ వర్షాలు: ముంబై జలమయం, పన్వెల్‌కు రెడ్ అలర్ట్, పాఠశాలలకు సెలవు

మహారాష్ట్రలో గత రెండు రోజులుగా ఎడతెరిపి లేకుండా కురుస్తున్న భారీ వర్షాలతో ముంబై నగరంలో పలు ప్రాంతాలు జలమయమయ్యాయి. రోడ్లు నదులను తలపించాయి. గత 24 గంటల్లో పలు చోట్ల 200 మిల్లీమీటర్లకు పైగా వర్షపాతం నమోదైంది. రోడ్లపై మోకాళ్ల లోతు నీరు నిలిచి ట్రాఫిక్ స్తంభించింది. భారీ వర్షాల వల్ల మూడు విమానాలను దారి మళ్లించినట్లు అధికారులు తెలిపారు.

ఈ భారీ వర్షాల నేపథ్యంలో పన్వెల్, ఉరాన్, పాల్గర్, రాయగడ్ ప్రాంతాలకు వాతావరణ శాఖ రెడ్ అలర్ట్ జారీ చేసింది. దీంతో ఆయా ప్రాంతాల్లోని అన్ని పాఠశాలలు, కళాశాలలకు జిల్లా కలెక్టర్ సెలవు ప్రకటించారు. స్థానిక పరిస్థితులను బట్టి మరిన్ని విద్యా సంస్థలకు సెలవులు ఇవ్వాలని ప్రభుత్వం సూచించింది. అత్యవసరమైతే తప్ప ఇళ్ల నుంచి బయటకు రావద్దని అధికారులు ప్రజలను కోరారు.

వాతావరణ శాఖ సమాచారం ప్రకారం, మహారాష్ట్రలోని పలు ప్రాంతాలతో పాటు దక్షిణ బెంగాల్లో కూడా భారీ వర్షాలు కురిసే అవకాశం ఉంది.