సముద్రంలో ప్రతి రాత్రి ట్రిలియన్ల జీవుల ప్రయాణం: భూమి వాతావరణంపై ప్రభావం

ప్రతి రాత్రి సముద్రంలో 200 నుంచి 1000 మీటర్ల లోతు నుంచి ట్రిలియన్ల సంఖ్యలో సముద్ర జీవులు ఉపరితలానికి వలస వస్తాయి. ఇది భూమిపై జరిగే ప్రపంచంలోనే అతిపెద్ద జంతు వలస. ఉదయం కాగానే ఈ జీవులు మళ్లీ లోతుల్లోకి వెళ్లిపోతాయి. ఈ ప్రక్రియను డయల్ వర్టికల్ మైగ్రేషన్ (DVM) అంటారు.

రెండో ప్రపంచ యుద్ధ కాలంలో నావికాదళాలు జలాంతర్గాములను గుర్తించేందుకు సోనార్ ఉపయోగించేవి. అనుకోకుండా సముద్ర అడుగు రాత్రి పైకి వచ్చినట్టు, పగలు లోపలికి వెళ్లినట్టు సోనార్ తరంగాలు చూపించాయి. శాస్త్రవేత్తలు దీనిని డీప్ స్కాటరింగ్ లేయర్ గా గుర్తించారు, అది నిజానికి లక్షల కోట్ల జీవులు కదిలే పొర. ఈ ప్రాంతాన్ని ట్విలైట్ జోన్ లేదా మెసోపెలాజిక్ జోన్ అంటారు.

ఇక్కడ నివసించే జూప్లాంక్టన్ వంటి సూక్ష్మ జీవులు, చేపలు, జెల్లీ ఫిష్ లు రాత్రి ఆహారం కోసం పైకి వస్తాయి. సూర్యరశ్మి లభించే ఉపరితలంపై ఫైటోప్లాంక్టన్ పెరుగుతుంది, ఇవి వాటి ప్రధాన ఆహారం. రాత్రి శత్రువుల నుంచి రక్షణ పొందుతూ వీటిని తిని, ఉదయానికి లోతులకు తిరిగి వెళతాయి.

సముద్ర పరిశోధకుడు జాన్ కాప్లీ 650 మీటర్ల లోతులో జలాంతర్గామిలో చీకట్లో వేలాది జీవులు మెరవడం గమనించారు, ఇది ఈ జీవుల బయోలుమినిసెన్స్. ఈ వలస వల్ల సముద్రంలో పోషకాల చక్రం కొనసాగుతుంది. అంతేకాకుండా, ఈ జీవులు కార్బన్ ను సముద్రపు లోతులకు తీసుకెళ్ళి 'బయోలాజికల్ కార్బన్ పంప్' ప్రక్రియ ద్వారా వాతావరణంలో కార్బన్ డయాక్సైడ్ స్థాయిలను తగ్గిస్తాయి. ఇది భూమి వాతావరణాన్ని ప్రభావితం చేసే కీలక సహజ ప్రక్రియ.