జనసేన సమావేశంలో పవన్ కళ్యాణ్: సంక్షేమంతో పాటు మౌలిక సదుపాయాలు కూడా అవసరం

జనసేన అధ్యక్షుడు, డిప్యూటీ సీఎం పవన్ కళ్యాణ్ ఆదివారం పార్టీ కీలక సమావేశంలో మాట్లాడారు.

ప్రభుత్వ వైద్యశాలలు, రోడ్లు, నీటి సరఫరా వంటి మౌలిక సదుపాయాలపై గత ప్రభుత్వం దృష్టి పెట్టలేదని ఆయన విమర్శించారు. సంక్షేమ పథకాలతోపాటు ప్రాథమిక సౌకర్యాలు కూడా మెరుగవ్వడం తప్పనిసరి అన్నారు.

"వెల్ఫేర్ స్కీమ్‌లపై మాత్రమే ప్రభుత్వాన్ని నడిపిస్తే ఓట్లు వస్తాయనుకోవడం సరికాదు. బేసిక్ ఇన్ఫ్రాస్ట్రక్చర్ లేకపోతే ప్రజలు మళ్లీ రారు" అని అభిప్రాయపడ్డారు.

ఈ సమావేశంలో పార్టీ నిర్మాణ కార్యక్రమాన్ని ప్రారంభించారు. రాష్ట్రవ్యాప్తంగా 22 లక్షల మంది సభ్యత్వం నమోదు చేసుకున్నారని, 18 వేల మంది సాధకులు క్షేత్రస్థాయిలో కృషి చేశారని తెలిపారు.

ప్రతి పార్లమెంటు నియోజకవర్గానికి 28 మంది సభ్యులతో సమాచార సేకరణ కమిటీలను ఏర్పాటు చేస్తున్నట్లు ప్రకటించారు. పార్టీ కోసం నిస్వార్థంగా పనిచేసిన నాయకుల వివరాలను సేకరించడమే ఈ కమిటీల లక్ష్యం అన్నారు. సేకరించిన సమాచారాన్ని తన పరిశీలనకు పంపించాల్సిందిగా సూచించారు.

ఈ సమాచారం ఆధారంగా భవిష్యత్తులో పార్టీ బాధ్యతలు కేటాయింపుపై సామూహిక నిర్ణయం తీసుకుంటామని పవన్ కళ్యాణ్ స్పష్టం చేశారు. సమావేశంలో దాదాపు 700 మంది కమిటీ సభ్యులు పాల్గొన్నారు.