దిల్లీలో పెట్రోల్‌-డీజిల్ వాహనాలపై నిషేధం: రేఖా గుప్తా కొత్త ఈవీ విధానం, వింటర్ యాక్షన్ ప్లాన్

దిల్లీ ముఖ్యమంత్రి రేఖా గుప్తా పెట్రోల్‌-డీజిల్ (ICE) వాహనాలపై గడువు విధిస్తూ కొత్త ఈవీ విధానాన్ని ప్రకటించారు. 2027 జనవరి నుంచి కొత్తగా పెట్రోల్‌-డీజిల్ టూ వీలర్లు, థ్రీ వీలర్ల నమోదును నిలిపివేయనున్నట్లు ఆమె తెలిపారు. ఈవీ కొనుగోలుదారులకు టూ వీలర్‌పై ₹10,000 వరకు ప్రత్యక్ష నగదు సబ్సిడీ, పాత వాహనాల స్క్రాపింగ్‌పై ₹10,000 అదనపు ప్రోత్సాహకం, రోడ్ ట్యాక్స్-రిజిస్ట్రేషన్ ఫీజు మినహాయింపు లభిస్తాయి. డిమాండ్ పెరగడంతో ఛార్జింగ్ ఇన్ఫ్రాస్ట్రక్చర్ను 2030 నాటికి 32,000 పాయింట్లకు విస్తరించాలని, సింగిల్ విండో క్లియరెన్స్ ద్వారా భూమి కేటాయింపు సులభతరం చేస్తామని సీఎం హామీ ఇచ్చారు. భారీ సరకు రవాణా ట్రక్కుల (N2) కేటగిరీకి ఈవీగా మారిన తొలి 1,000 వాహనాలకు 24 గంటల నో ఎంట్రీ మినహాయింపు, కేంద్రం నుంచి ఓఈఎంల ద్వారా 8% డిస్కౌంట్, 5% వడ్డీ రాయితీ లభిస్తాయి. ప్రభుత్వం తన వాహనాలను 100% ఈవీగా మార్చుకుంటుంది. ఇదే సమయంలో వింటర్ యాక్షన్ ప్లాన్‌ను ప్రకటించిన రేఖా గుప్తా, నవంబర్ 1 నుంచి ఫిబ్రవరి 28 వరకు BS6 కంటే తక్కువ ఉద్గార ప్రమాణాల వాణిజ్య వాహనాలను నగరంలో నిషేధించారు. డిసెంబర్ నుంచి జనవరి చివరి వరకు బయటి నిర్మాణ కార్యకలాపాలపై పూర్తి నిషేధం ఉంటుంది. పీయూసీ లేకుండా పెట్రోల్ ఇవ్వబోమని కూడా స్పష్టం చేశారు. ఈ ఆంక్షలు వాయు నాణ్యత సూచీ (ఏక్యూఐ) ఆధారంగా కాకుండా షెడ్యూల్ ప్రకారం అమలవుతాయి. అమలు కోసం అన్ని శాఖలు, ట్రాఫిక్ పోలీసులతో కలిసి సమన్వయం చేసుకుంటున్నామని, సరిహద్దు రాష్ట్రాలు, ఉత్తర మండలి ద్వారా కూడా సహకారం లభిస్తోందని సీఎం తెలిపారు. ప్రజా రవాణా 100% ఈవీ వైపు వెళ్తోందని, ఇప్పటికే 4,500 ఈవీ బస్సులు నడుస్తున్నాయని ఆమె చెప్పారు. వ్యర్థాల నిర్వహణ, మురుగునీటి శుద్ధి, మౌలిక వసతుల అభివృద్ధి తన ప్రాధమిక ప్రాధాన్యతలుగా సీఎం ప్రకటించారు. 'నేను ఎక్కువ మాట్లాడను, పనిచేసి చూపిస్తాను' అంటూ రేఖా గుప్తా దిల్లీ పౌరులకు భరోసా ఇచ్చారు.