పుస్తకాలు, యూనిఫాం ఆలస్యంపై ఎస్ఎఫ్ఐ ఆందోళన; పాఠశాల విద్యాశాఖ కమిషనర్ కార్యాలయం ముట్టడి

హైదరాబాద్‌లో పాఠశాల విద్యాశాఖ కమిషనర్ కార్యాలయాన్ని ఎస్ఎఫ్ఐ విద్యార్థి నేతలు ముట్టడించారు. విద్యారంగ సమస్యలపై ప్రభుత్వం వెంటనే స్పందించాలని డిమాండ్ చేస్తూ ర్యాలీగా వచ్చి నిరసన తెలిపారు. పోలీసులు వారిని అడ్డుకున్నారు.

ఎస్ఎఫ్ఐ నేతలు పలు సమస్యలను లేవనెత్తారు. ప్రభుత్వ పాఠశాలలు తిరిగి ప్రారంభమై నెల రోజులు గడిచినా, ఇంకా చాలా మంది విద్యార్థులకు పుస్తకాలు, యూనిఫాంలు పూర్తిగా అందలేదని ఆరోపించారు. పాఠశాలల్లో మౌలిక వసతులు కల్పించాలని, 27,000 పాఠశాలలను 4,000కు కుదించే ప్రభుత్వ ప్రతిపాదనను వెనక్కి తీసుకోవాలని డిమాండ్ చేశారు.

కార్పొరేట్, ప్రైవేట్ పాఠశాలల్లో ఫీజుల దోపిడి జరుగుతోందని, లక్షల రూపాయలు వసూలు చేస్తున్నారని ఎస్ఎఫ్ఐ ఆరోపించింది. ఫీజుల నియంత్రణకు ప్రభుత్వం కమిటీ ఏర్పాటు చేసినా, ఇప్పటివరకు ఎలాంటి చర్యలు తీసుకోలేదని విమర్శించారు. అనుమతి లేని ప్రైవేట్ పాఠశాలలను మూసివేయాలని, ఫీజు నియంత్రణ చట్టం తీసుకురావాలని డిమాండ్ చేశారు.

అలాగే, రాష్ట్రంలో చాలా మండలాల్లో ఖాళీగా ఉన్న మండల విద్యాశాఖాధికారి (ఎంఈఓ) పోస్టులను భర్తీ చేయాలని, ఇంచార్జిలుగా హెడ్ మాస్టర్లు పని చేస్తున్నారని వివరించారు. డిఈఓ పోస్టులు కూడా ఖాళీగా ఉన్నాయని, వాటిని భర్తీ చేయాలని డిమాండ్ చేశారు. ఈ సమస్యలను ప్రభుత్వం తక్షణమే పరిష్కరించాలని ఎస్ఎఫ్ఐ పట్టుబట్టింది.