తుని: 2.5 ఏళ్ల చిన్నారి గల్లంతు – పెంపుడు కుక్క అనుమానాస్పద మృతి

తుని మండలం దొండవాక పంచాయతీ సిహెచ్ అగ్రహారంలో 2.5 ఏళ్ల జ్ఞానేశ్వరి అనే చిన్నారి జూలై 6న అదృశ్యమై 11 రోజులైంది. చిన్నారి తండ్రి గణేష్ కొబ్బరి బొండాలు కోసేందుకు వెళ్తుండగా, తల్లి ఏడు నెలల చిన్నారిని చూసుకుంటున్నారు. ఈ సమయంలో జ్ఞానేశ్వరి ఇంటి బయట ఆడుకుంటూ, తండ్రి వెళ్లిన దారిలో పెంపుడు కుక్కతో వెళ్లి కనిపించకుండా పోయింది.

పోలీసులు, NDRF, SDRF సిబ్బంది సుమారు 200 మంది 50 ఎకరాల పామాయిల్ తోట, నల్లకొండ అటవీ ప్రాంతాన్ని జల్లెడ పట్టారు. డాగ్ స్క్వాడ్, థర్మల్ డ్రోన్‌లతో కూడా గాలింపు చేపట్టినా ఆధారం లభించలేదు. ఈ ప్రాంతంలోని ఫెన్సింగ్ దగ్గర చిన్నారిని చూసినట్లు గ్రామస్తుడు తాతారావు చెప్పారు. ఆయన దగ్గరికి వెళ్లేందుకు ప్రయత్నించగా కుక్క అరవడంతో వెనుతిరిగారు. గ్రామస్తులు ఆ విషయాన్ని తల్లిదండ్రులకు చెప్పడంతో గాలింపు ముమ్మరం చేశారు.

అదృశ్యమైన మూడు రోజుల తర్వాత కుక్క ఇంటికి తిరిగి వచ్చింది. కుక్క ప్రవర్తన అప్పటి నుంచి బిన్నంగా ఉంది. దానికి ఆహారం, నీరు ఇవ్వగా తీసుకోలేదు. దాని మెడలో GPS ట్రాకర్ అమర్చి విడిచిపెట్టగా, మరుసటి రోజు అనుమానాస్పద స్థితిలో చనిపోయింది. కుక్క శవాన్ని పోస్టుమార్టం నిమిత్తం విశాఖపట్నం ల్యాబ్‌కు పంపారు. నాలుగు రోజుల్లో నివేదిక వస్తుందని అధికారులు తెలిపారు.

చిన్నారి జాడపై ఎలాంటి ఆధారం లేదు. తల్లిదండ్రులు కుక్క చావుపై తీవ్ర ఆవేదన వ్యక్తం చేశారు. గ్రామస్తులు ఫెన్సింగ్ నుంచి చిన్నారి వెళ్లిందని చెపుతుండగా, తల్లిదండ్రులు మాత్రం ప్రీప్లాన్‌డ్ అపహరణ జరిగిందని ఆరోపిస్తున్నారు. కేసు దర్యాప్తు కొనసాగుతోంది.