అమరావతి సీడ్ యాక్సెస్ రోడ్డుకు భూసేకరణ: ఉండవల్లిలో రైతులతో పోలీసులకు ఘర్షణ

అమరావతి సీడ్ యాక్సెస్ రోడ్డు నిర్మాణానికి అడ్డుగా ఉన్న ఉండవల్లి పరిధిలోని 2.77 ఎకరాల భూమిని స్వాధీనం చేసుకునే క్రమంలో రైతులు, పోలీసుల మధ్య పెనుగులాట జరిగింది. శనివారం అధికారులు భారీ పోలీసు బలగంతో వెళ్లి భూమిని స్వాధీనం చేసుకున్నారు.

ఈ భూసేకరణ కోసం రాష్ట్ర ప్రభుత్వం ఇప్పటికే చట్టపరమైన ప్రక్రియ పూర్తి చేసింది. అధికారిక నోటిఫికేషన్ జారీ చేసి, 7.68 కోట్ల రూపాయల పరిహారం నిర్ణయించింది. శుక్రవారం రాత్రి భూసేకరణ అధికారులు బాధిత రైతులకు పరిహారం అందించేందుకు ప్రయత్నించగా, రైతులు తీసుకోలేదు. దీంతో నిబంధనల ప్రకారం పూర్తి పరిహారం మొత్తాన్ని విజయవాడలోని సబ్‌రిజిస్ట్రార్ కార్యాలయంలో డిపాజిట్ చేశారు.

శనివారం భూమి స్వాధీనానికి అధికారులు వెళ్లినప్పుడు దాదాపు 10 మంది రైతులు అడ్డుకునే ప్రయత్నం చేశారు. పోలీసులు వారిని నిలువరించే ప్రయత్నంలో ఘర్షణ జరిగింది. ఈ దృశ్యాలు సోషల్ మీడియాలో వైరల్ అయ్యాయి.

YSRCP అధినేత జగన్‌మోహన్ రెడ్డి సోషల్ మీడియా ప్రకటనలో ప్రభుత్వం రైతులకు పరిహారం ఇవ్వకుండానే పోలీసులతో బలవంతంగా భూములు లాక్కుంటోందని ఆరోపించారు. బాధిత రైతులకు తాము అండగా ఉంటామని చెప్పారు.

అధికారులు మాత్రం రైతులకు పరిహారం డిపాజిట్ చేసిన ఆధారాలు చూపిస్తూ, చట్ట ప్రకారమే స్వాధీనం చేసుకున్నామని వివరించారు. దీంతో అమరావతి సీడ్ యాక్సెస్ రోడ్డు పనులకు చివరి అడ్డంకి తొలగినట్లు అధికార వర్గాలు తెలిపాయి.