అమలాపురం: తల్లి, కొడుకు నిమిషాల వ్యవధిలో మరణించిన విషాద ఘటన

డాక్టర్ బీఆర్ అంబేద్కర్ కోనసీమ జిల్లా ఆత్రేయపురం మండలం రాలి గ్రామంలో శనివారం విషాదకర ఘటన చోటు చేసుకుంది. అనారోగ్యంతో బాధపడుతున్న చిట్టూరి అపర్ణను ఆసుపత్రికి తరలిస్తుండగా, ఆమె కుమారుడు సతీష్ ఇంట్లో గుండెపోటుతో మరణించాడు. కొద్ది నిమిషాల వ్యవధిలోనే అపర్ణ కూడా ఆటోలో మృతి చెందింది.

అపర్ణ గత 10 రోజులుగా తీవ్ర అనారోగ్యంతో బాధపడుతోంది. కోల్కతాలో ఇంజనీరింగ్ రెండో సంవత్సరం చదువుతున్న ఆమె పెద్ద కుమారుడు సతీష్ రెండు రోజుల క్రితం ఇంటికి వచ్చాడు. తల్లి క్షీణిస్తున్న ఆరోగ్యాన్ని చూసి తీవ్ర మానసిక ఒత్తిడికి లోనై అతను వాంతులు, విరేచనాలతో బాధపడ్డాడు.

శనివారం ఉదయం అపర్ణ ఆరోగ్యం మరింత క్షీణించడంతో బంధువులు, స్థానికులు ఆమెను అత్యవసరంగా ఆటోలో రావులపాలెం ఆసుపత్రికి తరలించారు. అపస్మారక స్థితిలో తల్లిని తీసుకెళ్తున్న దృశ్యం చూసి సతీష్ తీవ్ర గుండెపోటుతో ఇంట్లోనే కుప్పకూలిపోయి మరణించాడు. మార్గమధ్యంలో అపర్ణ కూడా మృతి చెందింది.

అపర్ణ భర్త వీరభద్రావు కొన్నేళ్ల క్రితం కరోనా బారిన పడి మరణించాడు. వీరికి ఇద్దరు కుమారులు. రెండో కుమారుడు రాజేష్‌ను బంధువులకు దత్తత ఇచ్చారు. ఇప్పుడు ఒకేసారి తల్లి, అన్న మరణించడంతో రాజేష్ ఇద్దరి అంత్యక్రియలు నిర్వహించాడు.