కృష్ణా జిల్లాలో పీడీఎస్ రైస్ మాఫియాతో అధికారుల సంబంధ ఆరోపణలు

కృష్ణా జిల్లాలో పబ్లిక్ డిస్ట్రిబ్యూషన్ సిస్టం (పీడీఎస్) బియ్యం మాఫియా కార్యకలాపాలు పెరిగిపోతున్నట్లు ఆరోపణలు వచ్చాయి. రేషన్ బియ్యం అక్రమంగా సరిహద్దులు దాటిస్తున్న ఈ దందాకు కొందరు రెవెన్యూ, పోలీస్ అధికారులు సహకరిస్తున్నారని ఫిర్యాదులు అందినట్లు తెలుస్తోంది.

జిల్లాలో మొత్తం 11,17,933 రేషన్ కార్డులు ఉండగా, నెలకు దాదాపు 17,000 మెట్రిక్ టన్నుల బియ్యం సరఫరా అవుతోంది. అయితే, ఈ బియ్యంలో సుమారు 20% పేద కుటుంబాలకు చేరడం లేదని, కేజీకి రూ.10 చొప్పున ప్రజల నుంచి కొని ఇతర రాష్ట్రాలకు తరలిస్తున్నారనే ఆరోపణలు ఉన్నాయి.

ఉయ్యూరు, గుడివాడ, తిరువూరు, నందిగామ రెవెన్యూ డివిజన్లలో ముగ్గురు డిప్యూటీ తహసీల్దార్లు (డీటీలు), నలుగురు పోలీస్ అధికారులు సహా మరికొందరు నెలవారీ మామూలు తీసుకుంటూ ఈ అక్రమ రవాణాను సురక్షితంగా సాగనిస్తున్నారని ఆరోపిస్తున్నారు. డీటీలు రూ.30,000, పోలీసులు రూ.30,000 నుంచి రూ.50,000 వరకు వసూలు చేస్తున్నట్లు, అలాగే రేషన్ డీలర్ల నుంచి నెలవారీ ప్రొటెక్షన్ డబ్బు వసూలు చేస్తున్నారనే చర్చలు ఉన్నాయి.

ఈ విషయమై ఉన్నతాధికారులకు ఫిర్యాదులు అందగా, నిందిత అధికారుల జాబితా తయారు చేసినట్లు సమాచారం. ప్రస్తుతం అంతర్గత విచారణ జరుగుతున్నట్లు, త్వరలో చర్యలు తీసుకునే అవకాశం ఉన్నట్లు తెలుస్తోంది.