తెలంగాణలో రైతులకు వాతావరణ సూచన: రాబోయే ఐదు రోజులు తేలికపాటి నుండి మోస్తరు వర్షాలు

హైదరాబాద్ వాతావరణ కేంద్రం మరియు ప్రొఫెసర్ జయశంకర్ తెలంగాణ వ్యవసాయ విశ్వవిద్యాలయం రైతులకు వాతావరణ ఆధారిత వ్యవసాయ సూచనలు విడుదల చేశాయి. రాబోయే ఐదు రోజులు రాష్ట్రంలో చాలా చోట్ల తేలికపాటి నుండి మోస్తరు వర్షాలు కురిసే అవకాశం ఉందని, కొన్ని చోట్ల భారీ వర్షాలు కూడా పడవచ్చని తెలిపాయి. పగటి ఉష్ణోగ్రతలు 30 నుండి 36 డిగ్రీల సెల్సియస్, రాత్రి ఉష్ణోగ్రతలు 24 నుండి 30 డిగ్రీల సెల్సియస్ మధ్య నమోదు కావచ్చు.

ఉరుములు, మెరుపులతో కూడిన వర్షాలు కురిసే అవకాశం ఉన్నందున రైతులు చెట్ల కింద నిలబడరాదు. పశువులు, గొర్రెలు, మేకలను చెట్ల కింద ఉంచవద్దు. విద్యుత్ స్తంభాలు, విద్యుత్ తీగలు, చెరువులు, నీటి కుంటలకు దూరంగా ఉండాలి. భారీ వర్షాలు కురిస్తే పొలం నుండి మురుగు నీటిని తొలగించడానికి కాలువలు తయారు చేసుకోవాలి. పంట పొలాల్లో మందులు పిచికారీ చేయడాన్ని తాత్కాలికంగా వాయిదా వేయాలి. తేలికపాటి నుండి మోస్తరు వర్షాలు కురిసిన ప్రాంతాల్లో వర్షాధార పంటలకు పైపాటు ఎరువులు అందించుకోవాలి.

ఇప్పటికే పత్తి విత్తిన రైతులు 7 నుండి 10 రోజుల్లో మొలక రాని చోట మళ్లీ విత్తనం విత్తుకోవాలి. బీటీ రకాలను బోదెలు, కాలువల పద్ధతిలో విత్తుకోవడం మంచిది. మొక్కజొన్న మధ్య దీర్ఘకాలిక రకాలను జూలై 15 తర్వాత విత్తడం ఆపాలి. స్వల్పకాలిక రకాలను జూలై 15 నుండి 31 వరకు విత్తుకోవచ్చు. చెరుకు 4 నెలల వయసులో మొక్కల మొదళ్లకు మట్టిని ఎగదోస్తే గాలి, వర్షానికి చెట్లు పడిపోకుండా ఉంటాయి. తీగజాతి కూరగాయలు విత్తడానికి ఇది అనుకూల సమయం. మిరప, టమాట, వంగ, బంతి పంటలను ఎత్తు మడుల మీద నారు పోస్తే కుళ్ళు తెగులు నివారించవచ్చు. మామిడి కోత అనంతరం 2-4 వారాల తర్వాత ఎండు కొమ్మలను, అడ్డంగా పెరిగిన కొమ్మలను కత్తిరించడం వల్ల మొక్కకు గాలి, వెలుతురు లభిస్తాయి.

ప్రస్తుత వాతావరణం కోళ్లలో కొక్కెర తెగులు, గొర్రెల్లో చిటుకు మరియు PPR, ఆవులు, గేదెల్లో గొంతువాపు వ్యాధి వచ్చే ప్రమాదం ఉంది. వీటి నివారణకు టీకాలు వేయించాలని, గొర్రెల్లో నట్టల కోసం డీ వార్మింగ్ చేయాలని సూచించారు.