తమిళనాడులో జాతకం నమ్మి కుమారుడ్ని హత్య చేసిన తండ్రి అరెస్ట్

తమిళనాడులోని తేనీలో ఓ తండ్రి తన కుమారుడ్ని చంపి మృతదేహాన్ని నదిలో పడేసిన ఘటన బయటపడింది. కుమారుడు తనకు ప్రమాదకరమని జ్యోతిష్కుడు చెప్పడంతోనే ఈ హత్య చేసినట్లు నిందితుడు అంగీకరించాడు.

50 ఏళ్ల వేందర్ బాల అనే వ్యక్తి తమిళగ మక్కల్ మున్నేట్ర కళగం పార్టీలో సభ్యుడు. ఆయన తొలి భార్య రాజలక్ష్మి కుమారుడు శ్రీకాంత్ (20) ఆస్తి విషయంలో తండ్రితో తరచూ గొడవపడేవాడు. 2023లో శ్రీకాంత్ అదృశ్యం కావడంతో తల్లి మధురై హైకోర్టులో హెబియస్ కార్పస్ పిటిషన్ దాఖలు చేశారు.

కోర్టు ఆదేశాలతో 2026లో ఈ కేసు సీబీ-సీఐడీకి బదిలీ అయింది. దర్యాప్తులో శ్రీకాంత్‌కు, తేనీకి చెందిన అలెక్స్ పాండ్యన్ అనే వ్యక్తికి మధ్య పాత కక్షలు ఉన్నట్లు తేలింది. దీంతో పోలీసులు అలెక్స్ పాండ్యన్‌ను అరెస్ట్ చేసి విచారించగా, తాను వేందర్ బాలతో కలిసి శ్రీకాంత్‌ను చంపి ముక్కలుగా నరికి ముల్లై పెరియారు నదిలో పడేసినట్లు ఒప్పుకున్నాడు.

బుధవారం రాత్రి వేందర్ బాలను అదుపులోకి తీసుకుని ప్రశ్నించగా, జ్యోతిష్కుడి వద్ద జాతకం చూపించగా "కుమారుడితో నీకు ప్రమాదం ఉంది" అని చెప్పడంతోనే హత్య చేసినట్లు నిందితుడు అంగీకరించాడు. ఈ కేసులో మరో నిందితుడు కురుప్పయ్య పరారీలో ఉన్నాడు.