ఖరీఫ్‌కు అనువైన అధిక దిగుబడి పెసర రకాలు.. వరంగల్ శాస్త్రవేత్త సూచన

ఖరీఫ్ సీజన్‌లో వర్షాధారంగా తక్కువ పెట్టుబడి, తక్కువ కాలంలో చేతికి వచ్చే పంట పెసర. మెట్ట ప్రాంత రైతులు ఏకపంటగా లేదా పత్తి, మొక్కజొన్నతో అంతర పంటగా పెసరను సాగు చేసుకోవచ్చని శాస్త్రవేత్తలు సూచిస్తున్నారు. జూలై 15 వరకు విత్తుకునే అవకాశం ఉంది.

వరంగల్ ప్రాంతీయ వ్యవసాయ పరిశోధనా స్థానం ప్రధాన శాస్త్రవేత్త డాక్టర్ సంధ్యా కిషోర్ ఖరీఫ్‌కు అనువైన పెసర రకాల వివరాలు తెలియజేశారు. తొలకరితో పాటు రబీ, యాసంగి కాలాలకు అనుకూలమైన W-42 యాదాద్రి రకం 60 రోజుల పంటకాలం కలిగి, పల్లాకు తెగులును తట్టుకుంటుంది. ఇది ఎకరానికి 4 నుంచి 5 క్వింటాళ్ల దిగుబడి ఇస్తుంది.

మరో రకం DGG-37 ఏకశిల పంటకాలం 75 రోజులు. పంట కోత ఒకేసారి వచ్చే ఈ రకం మెరుస్తున్న గింజలతో అన్ని కాలాలకు అనువైనదని గుర్తించారు. పల్లాకు తెగులును తట్టుకునే లక్షణం ఉంది.

ఎల్జీజీ 460 లాం పరిశోధనా కేంద్రం నుంచి విడుదలైన రకం. కాయలు గుత్తులుగా మొక్కపై భాగాన ఉండి, ఒకేసారి కోతకు వస్తాయి. 75 రోజుల పంటకాలంతో ఎకరానికి 5-6 క్వింటాళ్ల దిగుబడి ఇస్తుంది. ఇది కూడా పల్లాకు తెగులును తట్టుకుంటూ అన్ని కాలాలకు పండించవచ్చు. మధిర పరిశోధనా స్థానం నుంచి MG 295 రకం కూడా ఖరీఫ్, తొలకరి, రబీలకు అనుకూలం. కాయలు గుత్తులుగా ఉండి, ఏకకాలంలో కోతకు అనువుగా ఉండి అధిక దిగుబడి ఇస్తుంది.

శాస్త్రవేత్తలు ఈ రకాల్లో ఏదో ఒకటి ఎంచుకుని పెసరను సాగు చేయాలని సూచిస్తున్నారు. నీరు నిలవడం, చవుడు నేలలు మాత్రం పెసరకు పనికి రావు. వర్షాధార క్షేత్రాల్లో సకాలంలో వేస్తే మంచి ఫలితం సాధించవచ్చు.